Si t’i mbroni flokët nëse frekuentoni plazhin, këshillat e rëndësishme që duhet t’i dini

Temperaturat e verës, dielli, kripa e detit, era dhe klori nga pishinat mund të ndikojnë negativisht në flokët tuaj.

Ndërsa shumica prej nesh përqendrohemi në mbrojtjen e lëkurës sonë gjatë verës, është e rëndësishme të kujtojmë se flokët tanë kanë nevojë për po aq shumë vëmendje dhe kujdes.

Gjatë verës, flokët janë të ekspozuar ndaj ndikimeve të shumta të dëmshme. Rrezet UV mund t’i bëjnë ato të thatë, të brishtë dhe pa jetë, ndërsa uji i detit dhe era e përkeqësojnë më tej gjendjen e flokëve. Dëmtimi ndodh jo vetëm në sipërfaqe, por edhe në strukturën e brendshme të flokëve.

Prandaj, këshillohet të shmangni tharjen e tyre me tharëse, drejtimin e tyre [me pajisje të nxehta] gjatë këtyre muajve.

Është mirë që flokët të thahen natyrshëm pas larjes dhe të ofroni kujdes shtesë duke përdorur maska, balsam dhe vajra.

Përpara se të shkoni në plazh, është e dobishme të shkurtoni majat e çara për të parandaluar këputjen e mëtejshme të flokëve. Flokët që janë tashmë të dëmtuar e kanë më të vështirë të ruajnë lagështinë dhe lëndët ushqyese, kështu që mund të thahen edhe më shpejt nën ndikimin e diellit dhe kripës.

Një truk i thjeshtë për kujdesin në plazh është shpëlarja e flokëve me ujë të pastër menjëherë pasi të keni dalë nga deti. Kjo largon kripën e tepërt dhe parandalon tharjen e mëtejshme. Pas kësaj, mund të aplikoni një balsam ose një maskë të lehtë që do t’i rikthejë lagështinë dhe shkëlqimin flokëve tuaj.

Përveç flokëve, është e rëndësishme t’i kushtoni vëmendje edhe skalpit të kokës. Gjatë ekspozimit të zgjatur në diell, skalpi juaj mund të digjet njësoj si lëkura juaj. Një mënyrë e mirë për të mbrojtur veten është të aplikoni një krem ​​mbrojtës nga dielli në ndarjen e flokëve ose ta spërkatni lehtë në skalpin e kokës.

Nëse dëshironi hidratim shtesë gjatë pushimeve, mund të përdorni përbërës natyralë si avokado, i cili ushqen dhe zbut flokët tuaj. Vera është koha ideale për t’i trajtuar flokët butësisht dhe me kujdes, duke shmangur çdo gjë që mund t’i dobësojë më tej ato.

Pas kthimit nga plazhi, rekomandohet të vazhdoni kujdesin me trajtime të thella për të ndihmuar flokët të rikuperohen dhe të rifitojnë shkëlqimin e tyre natyror. Prerjet e rregullta të flokëve, hidratimi dhe një qasje e butë janë çelësat për flokë të bukur dhe të shëndetshëm – si gjatë verës ashtu edhe pas saj.