Në Evropë, ku Kosova do të detyrohet të importojë energji elektrike nëse riparimi i kapaciteteve të prodhimit në KEK do të marrë kohë, çmimet e energjisë elektrike janë aktualisht shumë të larta.

Një megavat-orë në tregun global ka arritur çmimin mbi 115 euro për megavat-orë të mërkurën, sipas çmimeve në bursën ndërkombëtare.

Në bursën hungareze, nga ku Kosova importon shpesh energji elektrike, çmimi për një megavat-orë energji elektrike ishte 117,93 euro më 9 prill.

Çmimi i energjisë në bursat ndërkombëtare vazhdon të mbetet i lartë, krahasuar me nivelet para krizës energjetike që goditi Evropën në vitin 2020, krizë e shkaktuar kryesisht nga pandemia.

Në Kroaci, çmimi i një megavat-orë energji elektrike është 113 euro, sipas të dhënave të publikuara në uebfaqen specializuese euenergy.live.

Për Kosovën, këto çmime do të sjellin kosto edhe më të larta, duke përfshirë edhe kostot për transportin e energjisë elektrike.

Sistemi elektroenergjetik i Kosovës ka arritur kulmin e krizës të mërkurën në mbrëmje, kur Njësia B1 e termocentralit Kosova B ka dalë jashtë funksionit. Burime pranë Korporatës Energjetike të Kosovës kanë konfirmuar se vetëm Njësia A4 është ende në punë.

Aktualisht, KEK po prodhon 114 megavat-orë, ndërsa kërkesa në tregun e brendshëm ka kaluar 1000 megavat-orë. Nga pesë njësi të prodhimit të energjisë në KEK, vetëm një është aktive tani. Njësia A3 ka ndaluar punën të martën në mbrëmje, ndërsa Njësia B2 është në remont.

Përveç 114 megavatëve nga KEK, Kosova po prodhon gjithashtu 68 megavatë të tjerë nga burimet e energjisë së rinovueshme. Megjithatë, situata vazhdon të mbetet e rënduar.

Kjo është konfirmuar edhe nga KEK në një njoftim për media të enjten. Korporata njoftoi se Njësia B2 e Termocentralit Kosova B ka dalë jashtë funksionit të mërkurën në mëngjes për shkak të rrjedhjeve të konsiderueshme të ujit. Puna për sanimin e dëmeve do të zgjasë deri në 48 orë, ndërsa KEK ka arritur të sigurojë rreth 5000 megavat energji elektrike nga burime të jashtme, që përfaqësojnë 90% të kapacitetit të planifikuar të njësisë B2.