ZRRE vendos nesër për çmimin e ri të energjisë elektrike

Zyra e Rregullatorit për Energji (ZRRE) do të mblidhet nesër në orën 10:00 për të shqyrtuar dhe vendosur për rritjen e mundshme të çmimit të energjisë elektrike për vitin 2025.

Në mbledhjen e planifikuar do të diskutohen shtatë pika kryesore, ndërsa vendimi përfundimtar pritet të hyjë në fuqi nga data 1 maj.

Rritja e propozuar, sipas disa burimeve, mund të arrijë deri në 15 për qind. Në këtë rast, konsumatorët që shpenzojnë deri në 800 kWh në muaj, të cilët aktualisht paguajnë 7.79 centë për kWh gjatë ditës, do të duhet të paguajnë rreth 8.96 centë.

ZRRE-ja i rishikon tarifat çdo vit, dhe ato mbesin në fuqi nga 1 prilli deri më 31 mars të vitit tjetër. Këtë vit, siç thuhet nga institucioni, nevoja për rritje është e lidhur me uljen e prodhimit vendor, shtimin e konsumit dhe varësinë e madhe nga importi me kosto të lartë.

Ndërkohë, Ministrja e Ekonomisë, Artane Rizvanolli, ka kërkuar që çdo shpenzim i panevojshëm të mos i faturohet qytetarëve, duke theksuar se përgjegjësia duhet t’u takojë operatorëve të energjisë.